महाराष्ट्राचा हवामान अंदाज : ४ ऑगस्ट

कोकण, घाटमाथ्यावर जोरदार पावसाची शक्यता

पुणे : पावसाची उघडीप असल्याने राज्याच्या अनेक भागात ऊन सावल्यांचा खेळ सुरू आहे. उद्या (ता.४) कोकणात सर्वदूर, विदर्भात काही ठिकाणी, तर उर्वरीत राज्यात तुरळक ठिकाणी पावसाचा अंदाज आहे. कोकण आणि मध्य महाराष्ट्राच्या घाटमाथ्यावर तुरळक ठिकाणी जोरदार पावसाची शक्यताही हवामान विभागाने वर्तविली आहे.

वायव्य मध्य प्रदेशात हवेचे ठळक कमी दाबाचे क्षेत्र सक्रीय असून, त्याची तीव्रता कमी होण्याचे संकेत आहेत. मॉन्सूनचा आस असलेल्या कमी दाबाचा पट्टा राजस्थानच्या जैसलमेरपासून कमी दाब क्षेत्राच्या केंद्रामधून बांग्लादेश, अरूणाचल प्रदेशकडे आहे. मॉन्सूनचा आस उत्तरेकडे सरकण्याची शक्यता आहे.

कमी दाबाच्या क्षेत्रामुळे मध्य प्रदेश, राजस्थानमध्ये दोन दिवस पावसाचा जोर कायम राहणार आहे. उद्या (ता.४) उत्तर महाराष्ट्र आणि गुजरातच्या किनाऱ्यालगत जोरदार वारे वाहण्याची शक्यता आहे. कोकणातील ठाणे, रायगड, रत्नागिरीसह, मध्य महाराष्ट्रातील पुणे, सातारा जिल्ह्यांच्या घाटमाथ्यावर तुरळक ठिकाणी जोरदार पावसाचा इशारा आहे. तर विदर्भ काही ठिकाणी, मध्य महाराष्ट्र, मराठवाड्यात तुरळक ठिकाणी हलक्या सरींसह पावसाची उघडीप राहण्याचा अंदाज हवामान विभागाने वर्तविला आहे.

मंगळवारी (ता. ३) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस (मिलीमीटरमध्ये) :

कोकण :
माथेरान ४०, मंडणगड ३०, दापोली, जव्हार, कर्जत, खालापूर, माणगाव, मोखेडा, मुलदे, राजापूर, रोहा, संगमेश्वर, देवरूख, सुधागड, पाली, ठाणे, वेंगुर्ला, वाडा प्रत्येकी २०.

मध्य महाराष्ट्र :
महाबळेश्वर ७०, लोणावळा, राधानगरी प्रत्येकी ४०, गगणबावडा ३०, इगतपुरी, नवापूर, पौड, पेठ प्रत्येकी २०.

विदर्भ :
अहेरी, भामरागड, कोर्पणा, मालेगाव प्रत्येकी ३०, आर्णी, बल्लारपूर, एटापल्ली, घाटंजी, गोंड पिंपरी, वाशीम, झारी झामनी प्रत्येकी २०.

घाटमाथा :
वळवण १४०, शिरगाव, दावडी प्रत्येकी ९०, ताम्हिणी ७०, डुंगरवाडी ६०, आंभोणे, भिरा प्रत्येकी ४०.

हवामान विषयक अपडेट आणि बातम्यांसाठी महावृत्तच्या फेसबुक पेजला लाईक करा.
येथे क्लिक करा