पुणे : अनुकूल हवामान नसल्याने राज्यात पावसाने मारलेली दडी चार-पाच दिवस कायम राहण्याचे संकेत आहेत. १६ तारखेपासून विदर्भात पावसाला सुरूवात होण्याची शक्यता आहे. उद्या (ता.१२) मराठवाड्यात विजांसह हलक्या पावसाचा अंदाज आहे. कोकणात अनेक ठिकाणी, तर उर्वरित राज्यात तुरळक ठिकाणी पावसाचा अंदाजही हवामान विभागाने वर्तविला आहे.
बिहार आणि परिसरावर समुद्र सपाटीपासून ४.५ किलोमीटर उंचीवर चक्राकार वारे वाहत आहेत. त्यापासून आंध्र प्रदेशपर्यंत हवेचा कमी दाबाचा दक्षिणोत्तर पट्टा तयार झाला आहे. मॉन्सूनचा आस असलेल्या कमी दाबाचा पट्टा पंजाबच्या अमृतसर पासून अरुणाचल प्रदेशपर्यंत कायम आहे. मॉन्सूनच्या आसाचे पश्चिम टोक सर्वसाधारण स्थितीत आहे. तर पूर्व टोक हिमालयाच्या पायथ्याकडे आहे.
राज्यात उन्हाचा वाढलेला चटका कायम असून, तापमानाचा पारा ३० ते ३५ अंशांच्या दरम्यान आहे. बुधवारी (ता. ११) सकाळपर्यंतच्या २४ तासांमध्ये चंद्रपूर येथे सर्वाधिक ३५.२ अंश सेल्सिअस तापमानाची नोंद झाली. तर मालेगाव, सोलापूर, परभणी, बीड, अकोला, अमरावती, ब्रह्मपूरी, वर्धा येथे तापमानाचा पारा ३३ अंशांच्या पुढे सरकला आहे.
राज्यात बहुतांशी ठिकाणी कमाल तापमानामध्ये सरासरीपेक्षा २ ते ५ अंशांपर्यंत वाढ झाली. उन्हाचा चटका आणि उकाडाही वाढला आहे. उद्या (ता. १२) मराठवाड्यातील औरंगाबाद, बीड, जालना, उस्मानाबाद, परभणी, हिंगोली, नांदेड, लातूर जिल्ह्यात विजांसह हलक्या पावसाची शक्यता आहे. तर उर्वरित राज्यात तुरळक ठिकाणी हलक्या सरींसह, मुख्यतः कोरड्या हवामानाचा अंदाज वर्तविण्यात आला आहे.
बुधवारी (ता. ११) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात सरासरीच्या तुलनेत तफावत (अंश सेल्सिअसमध्ये) :
पुणे २७.६ (०.३), जळगाव ३२.४ (२), कोल्हापूर २८.३ (२.२), महाबळेश्वर १९.७ (०.४), मालेगाव ३३.२ (४.५), नाशिक २९.१ (१.६), सांगली २९.३ (१.३), सातारा २८.८ (२.६), सोलापूर ३३.६ (२.७), सांताक्रूज ३१.९ (२.२), अलिबाग ३२.० (२.६), डहाणू ३२.१ (२.२), रत्नागिरी ३०.५ (२.१), औरंगाबाद ३०.८ (२.२), बीड ३३.० (३.५), परभणी ३३.२ (२.९), अकोला ३३.९ (३.५), अमरावती ३३.४ (४.५), बुलडाणा ३१.० (३.९), चंद्रपूर ३५.२ (४.७), गोंदिया ३२.० (१.३), नागपूर ३२.८ (२.२), वर्धा ३४.० (३.८), यवतमाळ ३१.८ (३).
